Manarimaan ti panagsagana dagiti delagasyon iti siudad ti Baguio para iti mapadpadaanan a Cordillera Administrative Region Athletic Association (CARAA) Meet 2025.
Iti pannakiuman ti Bombo Radyo kenni Niño Tibangay, Chief Education Supervisor-DepEd Baguio, kinunana a manarimaan paylaeng ti panangpilida kadagiti atleta a mangirepresentar iti siudad.
Sigun kenkuana, mapili dagiti atleta iti babaen iti manarimaan a palarong panglungsod a nangrugi idi Enero a dies ken agleppas daytoy inton Enero baente sais.
Kinunana a nalpas dagiti dadduma nga ay-ayyam ngem manarimaaan paylaeng ti football ken dadduma pay.
Malaksid iti dayta, saan paylaeng a nakapili dagitoy kadagiti atleta para iti volleyball agsipud ta kasapulanda nga urayen ti resulta dagiti makipastisipar sadiay Metro Manila.
Iti baet dayta, target met dagitoy ti 196 nga atleta para iti elementarya, 335 nga atleta iti secondarya ken 29 met iti special games.
Namnamaen met dagitoy a manayunan dagiti delagasyon nangruna iti weightlifting, muaythai ken dadduma pay.
Impetteng met ni Tibangay a dakkel a tulong kadagitoy dagiti nakaenroll iti sports program iti siudad.
Iti baet dayta namnamaenna nga agballigi dagitoy iti nasao nga ay-ayam babaen iti naan-anay panagsanay dagitoy.
