Posible nga ad-adda pay a ngumina ti rosas kadagiti pagtagilakoan iti Baguio City bayat nga umadani ti Valentine’s day.
Iti panakiuman ti Bombo Radyo kenni Antonio Leon, presidente iti Flower Section iti Baguio City Public Market, ti posible a panagngato iti presyo ti rosas ken daduma pay a sabong partikular inton February 12 ken February 13 ket gapu metlaeng iti manamnama a panagado dagiti gumatang.
Posible a dumanon daytoy iti P1300 agingga P1500 kadagiti nadakamat a petsa.
Iti agdama, dumanonen iti P1000 ti balor ti maysa a bundle iti XL Roses a buklen iti dua a dosena, P900 met ti large, P700 ti medium, bayat a P600 ti short.
Sigun kenni Leon,kanginaan ti Red Roses ngem adda mabalin a pagpilyan dagiti customer gapu ta magatang metlaeng ti peach, pink, ken puraw a kolor iti rosas.
Malaksid iti rosas, adu pay a klase iti sabong iti mabalin a magatang kas iti Carnation nga agay-ayam laeng iti P300 tunggal dosena para iti lokal a prodyus bayat a dumanon met iti P700 ti tunggal bente a piraso dagiti imported Carnation.
Iti sabali a bangir, dumanon met ti presyo iti Sunflower iti P15 tunggal piraso iti agdama.//Bombo Rob Dominguez
