BAGUIO CITY – Agtultuloy nga iyap-apela dagiti mannalon iti Benguet ti panangipataw ti maseknan nga ahensia ti gobierno iti price freeze iti abono kagiddan ti agtultuloy a panagbaba ti presio dagiti nateng.
Sigun kadagiti mannalon, nag-triple ti presio dagiti fertilizers a mailaklako iti merkado sipud pay idi 2019.
Manipud iti P800 agingga P900 a sigud a presio ti tunggal 50 a kilo ti urea ket ngimmato daytoy iti P2,300 agingga P2,400 ita a tawen.
Sigun kenni Agot Balanoy, panakabagi ti League of Associations iti La Trinidad Vegetable Trading Areas, makatulong ti price freeze kadagiti mannalon ngem nasaysayaat latta nu adda ti permanente a localized a solusion tapno saan nga agdependar dagiti mannalon iti imported nga abono.
Impettengna a ngumatngato ti presio dagiti farm products ken cost of production ngem bumababa met ti presio dagiti nateng a nangitunda iti panagproblema dagiti mannalon iti kapital a pagrugianda manen.
Impaganetget ni Balanoy a nu saan a kabaelan ti gobierno a solusion iti kabiitan a panawen ti nangato a presio dagiti farm inputs ket tulonganda dagiti mannalon a mangilako kadagiti mulada a nateng tapno makasubbot met dagitoy.
Sigun met iti Department of Agriculture, agtigtignayda tapno masolusionan ti parikut dagiti mannalon.
Ikamkampanya met ti ahensia dagiti alternatibo a wagas tapno maksayan ti panagaramat ken panaggastos dagiti mannalon kadagiti inorganic fertilizers.
Maysa ditoy ti panagaramat ti dayami no sadino imbes a puroan dagitoy ket iconvert iti compost ken chicken dung.
