Nakailista ti probinsya ti Benguet iti baro a 688 a kaso ti Dengue idi napalabas a lawas wenno manipud Agosto a onse agingga Agosto dise syete, sigun iti Provincial Epidemiology and Surveillance Unit ti Provincial Health Office.
Iti nasao a datos, maysa ti pimmusay manipud iti munisipyo ti La Trinidad.
Kabayatanna, manipud Enero a uno agingga Agosto dise syete iti agdama a tawen, dumanon iti 5,398 a kaso ti dengue ti nailista iti probinsya ti Benguet.
Daytoy ket buklen ti Atok a 109 a kaso; Bakun nga 84; Bokod a 426; Buguias 264; Itogon nga 616; Kabayan nga 784; Kapangan nga 260; Kibungan nga 68; La Trinidad nga 1, 487; Mankayan nga 418; Sablan nga 169; Tuba nga 379 ken Tublay nga 334.
Mapalpalagipan met ti publiko maipapan ti panangprebentar iti panagraira ti dengue kas iti pangkita a nadalus ti aglawlaw tapno maliklikan ti nasao a sakit.
