Umdas ti produksyon ti sabong iti rehiyon Cordillera para iti umadanin a Valentines Day nangruna iti rosas.
Iti panakiuman ti Bombo Radyo kenni Andy Colte Sr., Siyentisang Magsasaka sa Pilipinas-Cut Flower Industry, kinunana a saan unay a naapektaran iti lammiis wenno frost dagiti mula a sabong nangruna kadagiti nakagreen house.
Sigun kenni Colte Sr.,dagiti mabalin a naapektaran ket dagiti sabong a naimula iti open field a mangituntunda iti nabayag a panagukrag dagiti sabong.
Kinuna ni Colte Sr., addan met dagiti nakaschedule a maapit a sabong para ita a bulan ti Pebrero a maipatulod kadagiti nagduduma a probinsya iti Luzon, Visayas ken Mindanao a pakairamanan ti Laguna, Pampangga ken Nueva Ecija.
Ngem ti kangrunaan a supsuplayan dagitoy ket ti Metro Manila.
Kabayatanna, manamnama ti panagngato ti presyo dagiti sabong nangruna ket nangato dagiti farm inputs nga isu’t agbalbalin a karit kadagiti cut flower industry.
Malaksid iti dayta, maysa a karit a sangsangoen dagitoy ket ti maipapan kadagiti smuggled a sabong a mangkomkompetensya kadagiti local produced flowers.
Gapu iti dayta, kiddawda ti panangsukimat ti Department of Agriculture maipapan kadagiti smuggled a sabong tapno saan a malugi dagiti cut flower farmers.
