Imbinglay ni Mody Floranda, National President ti grupo a PISTON, minimal laeng ti nariknada kadagiti programa nga impannakel ni President Ferdinand Marcos Jr. iti State of the Nation Address daytoy idi kalman.
Iti pannakiuman ti Bombo Radyo kenkuana, inyebkasna a nupay saan a maibaga nga awan ti naaramidan ti administrayon, saanda latta a narikna ken nakita dagiti programa ti gobyerno para kadakuada gapu ta sumagmamano laeng ti nagnumar iti daytoy.
Inaramid ni Floranda kas example ti P10 pesos fuel subsidy kadagiti gasolinaan. Sigun kenkuana, 230 laeng a gasolinaan ti mangipatpatungpal iti daytoy,rason tapno kasapulan pay laeng a biruken dagiti drivers dagiti gasolinaan a mangipatpatungpal iti nasao a programa.
Impeksana metlaeng a dagiti dinakamat ti presidente a programa ket saan a para iti amin, nu di ket para kadagiti sumagmamano laeng.
Impeksa ni Mody Floranda, National President ti grupo a PISTON a ti kayatda kuma a mangngeg iti SONA ni President Ferdinand Marcos, Jr. ket ti long-term a solusyon para iti pakaseknan iti sektor ti transportasyon.
Iti pannakiuman ti Bombo Radyo kenkuana, impeksa na kasapulan kuma nga agbalin nga ‘advanced’ ti gobyerno iti panangpanunot iti solusyon para iti sektor ti transportasyon.
Maysa kadagiti singasing ni Floranda ket ti kaadda kuma ti stock ti pagilian a Pilipinas iti produkto a lana tapno nu dumteng ti panawen a ngumato ti presyo ti petrolyo iti world market, saan unay a madagsenan dagiti drayber iti panagngato ti presyo ti petrolyo.
Kabayatanna, imbinglay ni Floranda a naklaat daytoy iti panangdakamat ni President Ferdinand Marcos, Jr. nga agtuloy ti Modernization Program iti pagilian. Sigun kenkuana, naklaat daytoy gapu ta idi napalabas a tawen, ti takder ti presidente seknan iti nasao nga isyu ket kasapulan nga adalen a nalaing ti nasao a programa.
Apaman met a nadamag daytoy nu enya ti assessment na iti SONA ti presidente, kinuna ni Floranda a kurang dagiti aksyon ti gobyerno gapu ta iti las-od ti upat a tawen a panangidaulo daytoy, agtultuloy latta ti mapadpadasan ti transport sector a panagrigrigat. //bombokaren.c.sapirao