Adu manen dagiti mangimunmuntar kadagiti tarpaulin ken posters dagiti politiko kadagiti poste ti linya ti kuryente pakairaman dagiti behikulo kagiddan ti umadani nga eleksion inton umay a tawen.
Kadagiti kaaduan maysa daytoyen a nasapa a panagkampanya nu sadino gundawayanda dagiti holidays kas iti Semana a mangipaay ti greetings wenno kablaaw ngem dakdakel iti portion ti naikabilan ti ladawan ken nagan dagitoy.
Makuna dagitoy nga “epal” gaputa maysa dagitoy a taktikada tapnu agpapansin wenno makabisado dagiti tatao dagiti naganda.
Gapu iti dayta, insingasing dagiti konsehal ti siudad iti panakamulta dagiti agimunmuntar dagitoy a materyales babaen iti anti-epal ordinance dagitoy.
Saklawen ti nasao nga ordinansa dagiti poste ti kuryente ken sadino man a sakupen ti siudad pakairaman pay dagiti parapubliko a pagluganan a mabalinda a pangimuntaran dagiti posters wenno tarpaulins dagitoy.
Nupay awan iti panggedeng ditoy iti commision on elections gaputa awan pay iti panagrugi ti kampanya wenno eleksion ,
Inaramid daytoyen ti lokal a gobierno kas proactive measure tapnu maliklikan ti panagadu dagiti nasao a posters.
Kadagiti kaaduan, nasayaat daytoy nga addang nga inaramid ti lokal a gobierno gaputa kaaduan kadagiti mangimunmuntar iti nasao nga poster wenno tarpaulin ket dagiti national politicians wenno partylist ken rumbeng a mamulta dagiti indibidual a nangimuntar kadagitoy.
Gaputa adda dagiti sumagmamano a materyales a saan pulos a naipakada kadagiti babarangay kadagiti maseknan nga ahensia wenno indibidual nga agtagikua kadagiti property a nangimuntaranda.
Maibilang laeng dagitoy kas kanayunan a parikot dagiti babarangay maipapan ti basura gaputa posible nga maikkat dagitoy bayat ti panaglabas ti panawen nu napigsa ti panagtudtudo ken posible pay nga agpullat kadagiti drainage wenno kanal.
Gapu ti dayta, nasken a mapapartak daytoy nga ordinansa ken maaprobaran tapnu maliklikan iti panagadu dagitoy.
Rumbeng metlaeng nga adaptaren dagitoy ti daduma a kabangibang a munisipyo gaputa naobserbaran nga adu metlaeng iti naimuntar kadagiti poste iti Beneco kadagiti national highways ti probinsia iti Benguet.//Bombo Raz Pagoli
