Impetteng ti Council of Elder wenno Community Elder a nasurot ti proseso ti Free, Prior, and Informed Consent (FPIC ) para ti mining exploration ti Crescent Mining and Development Corporation idiay Mankayan, Benguet.
Iti naisayangkat a panagtaripnong iti nagbaetan dagiti council member, validation team manipud ti National Commission on Indigineous People (NCIP), Mines and Geosciences Bureau, CMDC, ken dadduma pay nga stakeholder idiay Poblacion, Mankayan, Benguet, impresenta ni Atty. Materno Luspian, Chief ti Council Elder ken sigud a mayor ti Mankayan, dagiti amin a dokumento para iti mining exploration ti nadakamat a mining company.
Impaganetget ni Atty. Luspian a nasurot amin dagiti nasken a masurot ti proseso ti Free, Prior, and Informed Consent nu sadinno, immanugut dagiti amin a natataengan, ken IPMR para iti mining exploration ti nasao a kompania.
Bayat ti pannakaipatungpal ti validation nga indauloan ti validation team manipod iti National Office ti National Commission on Indigineous People, saan a naimatangan ti presensia dagiti barangay a “no” para iti mining exploration.
Sigun kenni Toriano Organo, Indigenous Peoples’ Mandatory Representative ti munisipyu ti Mankayan, nakitana met dagiti opisial ti Barangay, kasta metten dagiti Indigenous Peoples’ Mandatory Representative ti Barangay Bulalacao ken Guinaoang, ngem apagbiit laeng dagitoy.
Sigun kenni Organo, napateg kuma ti presensia dagitoy tapno ammuda ti ibagbagada kadagiti masakupanda iti kanito nga agsubli dagitoy iti barangayda.
Daytoy ket kagiddan metlaeng dagiti agwarwaras iti social media nga addan ti minas a mapaspasamak iti lugar.
Kabayatanna, nagpalawag met ti Regional Director ti Mines and Geosciences Bureau a ti permit nga adda ti nasao a mining company ket exploration laeng, saan a permit ti panagminas.
Kinuna pay ti nasao a kompania nga awan pay ti kita dagitoy.
Impettengna pay nga adu metten ti naaramidan ti nasao a barangay para iti pagimbagan dagiti umili a kas ti farm-to-market road a proyekto ken dadduma pay. | via Bombo Noveh Organo
