LA TRINIDAD, BENGUET – Naisayangkat ti public hearing seknan iti maisaksakad nga ordinansa a mangipaay iti solusyon kadagiti dangling wires iti munisipyo ti La Trinidad, Benguet ita nga aldaw.
Ti nasao nga aktibidad ket naisayangkat iti Municipal Hall nga inatendaran dagiti sumagmamano a municipal officials, Benguet Electric Cooperative personnel, telephone companies, ken umili iti nasao a munisipyo.
Maibasar iti umuna a “draft” ti ordinansa nga insurat ni Councilor Judde Bryan Lee, adda ti mabukel nga anti-dangling wires task force a mangipatungpal iti pagalagadan ti nasao nga ordinansa.
Nakalanad pay iti umuna a draft ti ordinansa a posible a marevoke wenno masuspindir ti business permits dagiti saan nga agtulnog kadagiti provisions.
Nakaawat met ti nasao a proposal iti nagduduma a suhestiyon ken komento para iti pannakapasayaat pay daytoy nu sadino karaman kadagiti naipaay a suhestiyon ket ti pannakaisurat ti umno a disposal dagiti dangling wires a maikkat, pannakanayon ti penalty kadagiti aglabsing iti nagduduma a provisions iti nasao nga ordinansa, pannakaisurat ti minimum height ground clearance dagiti wires, ken dadduma pay.
