Al-allukuyen ti Baguio City Female Jail Dormitory ti publiko a makipaset iti livelihood products live selling dagitoy ita nga aldaw.
Iti pannakaiuman ti Bombo Radyo kenni Jail Officer 1 Priszalia Manengyao, Community Relations Officer manipud Baguio City Female Jail Dormitory, kinunana nga agarup sangagasut a produkto ti ilako dagitoy babaen iti online no sadino nangrugi daytoy itay laeng 4:30 ti malem.
Dagiti produkto a mailako ket pakairaman dagiti bayong, beaded bags, pouches, wallet, Christmas ornaments, keychains ken dadduma pay.
Kinunana a panggep dagitoy a makatulong kadagiti persons deprived of liberty wenno PDL partikular kadagiti pamilyada ken annakda nga agad-adal iti ruar ken tapno makaadal pay dagitoy iti nagduduma nga skills a mausarda iti kanito a rumuar dagitoy iti pagbaludan.
Sigun kenkuana, daytoyen ti maikatallo a gundaway a panag-live selling da kadagiti nadakamat a produkto.
Inyebkasna metlaeng ti panagyamanda agsipud ta immadu dagiti customer dagitoy saan laeng nga iti siudad ti Baguio no diket iti intero a Pilipinas pakairamanan dagiti overseas filipino workers idiay ballasiw taaw.
Innayonna met a mabalin nga iscreenshot dagiti produkto a nakursunaadanda tapno aramiden manen dagitoy. Kabayatanna, maipalagip nga agarup innem a pulo ket siyam a babai ti adda iti Baguio City Female Dormitory iti agdama.
