Maal-allukoy ti publiko a makipaset iti opening ti Mangan Taku 2025 iti Rose Garden, Burnham Park, Baguio City inton bigat.
Kagiddan iti daytoy, indeklara ni Mayor Benjamin Magalong ti Abril baente kwatro agingga baente otso iti agdama a tawen kas aldaw a panakarambak ti Mangan Taku.
Daytoy ket babaen iti panangidaulo ti Department of Tourism-Cordillera.
Iti nasao a food fair, dumanon iti agarup tallo pulo nga stalls ti naipatakder no sadino maimatangan ken maidiaya dagiti Cordillera cuisines wenno dagiti indigenous foods kas iti pinikpikan, etag ken daduma pay manipud kadagiti nagduduma a probinsya iti rehiyon Cordillera.
Maipalagip a ti Mangan Taku Food fair ket na-institutionalized iti City Ordinance idi tawen 2019 kas nakalinya iti Proclamation No. 469 a nairuar idi tawen 2018 no sadino naideklara ti Abril kas Filipino Food month nga addaan panggep a mangitandudo iti panakapreserba dagiti Philippine culinary traditions.
