BAGUIO CITY – Pimmusay ti maysa a pulis bayat a nadangran ti tallo nga indibidual iti panagdinnungpar ti dua a motorsiklo sadiay Lawig, Lamut, Ifugao idi rabii.
Nabigbig ti pimmusay a ni Patrolman Jose Nipahoy Heppog, 27-anyos, residente ti Umilag, Lamut, Ifugao.
Maibasar iti report, agpakanigid kuma ti motorsiklo nga imanmaneho ni Henry Dulin a maysa a retirado a pulis paturong iti balayda sadiay Lawig, Lamut, Ifugao idi aksidente a nagdinnungparda iti motorsiklo nga imanmaneho ni Patrolman Heppog a nagtaud iti bangir a paset ti kalsada.
Nagsagrap iti dunor iti abaga ti retirado a pulis ken nadangran met ti likod ti back rider daytoy a ni Duff Dulnuan, 34-anyos, overseas Filipino worker ken residente ti Poblacion East, Lamut Ifugao.
Naitaray iti pagagasan ni Heppog ngem naideklara a dead on arrival bayat a nagsagrap iti dunor iti ulo ti back rider daytoy a nabigbig a ni Cadet 3rd Class Jesslee Tuguinay, 23-anyos, kadete ti PNPA ken residente ti Panopdopan, Lamut, Ifugao.
