Nangipatungpal ti Department of Transportation (DOTR), kadua da ti Transportation Office (LTO), Metropolitan Manila Development Authority (MMDA), ken ti Philippine Drug Enforcement Agency (PDEA), iti random drug testing kadagiti bus drivers iti Parañaque Integrated Terminal Exchange (PITX).
Ti nasao nga inisyatiba ket agtultuloy agingga inton Nobyembre 1, tapno maipasigurado ti kinatalged dagiti pasaheros nga agbyahe bayat ti Undas season.
Sigun kenni Department of Transportation Acting Secretary Giovanni Lopez, panggep ti ahensya a mapalawa ti implementasyon ti random drug testing tapno maitandudo ti agtultuloy a safety standards kadagiti transport sector.
Kinunana a nasken a mai-practice daytoy a polisiya no sadino iti kanito nga adda dagiti agpositibo iti confirmatory test ket maiturn-over kadagiti maseknan nga opisyal kasta metten ti dagus a panakakanselar dagiti lisensya dagitoy.
Innayonna pay nga amin a transportation facilities ket naka-heightened alert para iti Undas, tapno maipasigurado ti kinatalged ti publiko.
Kagiddan dayta, inrekomendar ni Office for Transportation Security (OTS) Chief Gilbert Cruz ti panakaimuntar dagiti kanayunan a CCTV cameras partikular kadagiti inspection tables.
