Nagpalagip ti Municipal Disaster Risk Reduction and Management Office-Itogon kadagiti umili sadiay Itogon, Benguet nga agridam dagitoy nangruna ita a panawen ti panagtutudo kasaruno ti napasamak kadagiti tallo a minero idi dominggo.
Iti pannakiuman ti Bombo Radyo kenni Engr. Cyril Batcagan, dadaulo ti Municipal Disaster Risk Reduction and Management Office-Itogon, imbalakadna kadagiti umili a bantayan wenno siputanda dagiti aglawlaw dagiti pagtaengan dagitoy nangruna ita a panawen a nalukneng ti daga kadagiti bantay.
Kinunana a dagus nga agbakwit dagitoy kadagiti evacuation centers no landslide prone ti lugarda ken maysa orasen a napigsa ti panagbayakabak ti tudo tapno maliklikan ti kapada nga insidente.
Kagiddan dayta, mabalballaagan metlaeng dagiti minero a saanda paylaeng nga umentra iti uneg ti pag-us-usakan dagitoy agsipud ta narisgo nangruna no agtudtudo.
Sigun kenkuana, idi paylaeng a namarkaan amin dagiti lugar a landslide prone no sadino adda dagiti babbalay a kinargaanda iti red sticker a kayatna a sawen a critical wenno delikado daytoy.
Nupay kasta, dadduma kadagiti umili sadiay ti nang-ikkat kadagiti nasao nga sticker bayat a dadduma ket nagpatakderda iti kampo uray no delikado daytoy.
Kabayatanna, kinuna met ni Shirley Mendez, employer dagiti minero a nagaburan iti landslida, a nakasaganada a tumulong kadagiti pamilya dagiti biktima.
Sidadaan metlaeng ti local government unit ti munisipyo ti Itogon para kadagiti nasao a biktima.//via Bombo Genzel Depayso
