BAGUIO CITY – Imbasura dagiti Board of Directors ti BENECO ti Resolution No. 2020-71 ti National Electrification Administration – Board of Administrators (NEA-BOA) a nangdutok kenni Atty. Ana Marie Banaag-Rafael kas general manager ti kooperatiba.
Immuna a tinalantan ti Board ti motion ni Engr. Rocky Aliping a panangaksionda iti surat ni NEA OIC Administrator Sonia San Diego a mangibilbilin iti panang-accomplish ti Board iti one-year performance management contract ni Atty. Rafael.
Nupay kasta, naibasura ti mosyon iti botos a 4 a pabor ken 6 a saan a pabor a nagresulta iti panag-inhibit ni Aliping iti panakatalantan ti maikadua a mosyon.
Simmaruno a natalantan ti mosyon para iti panangibasura ti Board iti NEA-BOA Resolution No. 2020-71 a nangdutok kenni Atty. Rafael.
Impalawag manen dagiti Board of Directors a kontra iti nasao a resolusyon dagiti rason iti panangtubngarda iti daytoy bayat nga inkalintegan met dagiti Board of Directors a pabor iti nasao a resolusyon dagiti rason ti panagpaborda iti daytoy.
Naaprobaran ti maikadua a mosyon kalpasan nga innem kadagiti Board of Directors ti pimmabor bayat a tallo dagiti kontra.
Nakedngan pay iti nasao a taripnong a ti performance management contract ket mapirmaan iti nagbaetan ti BENECO Board ken ni Engr. Melchor Licoben.
Iti naangay a taripnong, nagudua dagiti Board of Directors no sadino, pabor iti desisyon ti NEA-BOA da Engr. Rocky Aliping, Luke Gomeyac, Enrique Moresto ken James Aclopen bayat a pabor iti agdama a general manager ti BENECO da Peter Busaing, Mike Maspil, Robert Valentin, Father Jonathan Obar, Josephine Tuling ken Engr. Jeffred Acop.
