Temporario nga inrikep ti lokal a gobierno ti Dipaculao, Aurora ti Hermanos Leisure and Farm Resort kalpasan ti ipupusay dagiti Ateneo players a da Rene Clert Baterbonia ken Divine Adili idi Hunio 08, 2026.
Impaulog ni Mayor Danilo Tolentino ti closure order kalpasan ti assessment ti composite team manipud iti Business Permits and Licensing Office (BPLO), Municipal Tourism Office (MTO), Municipal Disaster Risk Reduction and Management Office (MDRRMO), ken Philippine Coast Guard (PCG).
Rumrumuar a saan a tungtungpalen ti resort ti sumagmamano a probision ti ordinansa nga “An Ordinance Promoting Safety in Seashores and Other Bodies of Water, Including Tourist Destinations, within the Jurisdiction of the Municipality of Dipaculao, Aurora.”
Kabayatanna, maipasidong iti forensic examination ti digital video recorder (DVR) footage a naala iti resort a nagdagusan dagiti student-athletes tapno makatulong iti imbestigasion.
Immuna nga inlaksid dagiti autoridad ti foul play iti ipupusay da Baterbonia ken Adili, bayat nga awan ti nasarakan nga ebidensia ti aniaman a nakaro a pannakadangran iti bagi dagitoy.
Maipalagip a pimmusay ni Baterbonia gapu iti asphyxia maibasar iti resulta ti autopsy iti bangkayna.
Kiniddaw met ti pamilya ni Adili a masayangkat ti autopsy sakbay a maibiahe ti bangkay ti anakda iti pagilianda a Nigeria.
