BAGUIO CITY – Maur-uray iti agdama ti resulta ti laboratory test dagiti taraken a baboy dagiti hog raisers iti probinsia ti Ifugao.
Daytoy ket kalpasan a nakaawat ti impormasyon ti Ifugao Provincial Veterinary Office nga adda ti naparti a walo a baboy sadiay Lagawe, Ifugao ken maatap nga apektado ti Afrisan Swine Fever (ASF ) virus.
Kabayatan ti panagurayda ti resulta ti lab test ket nangipaulog ni Ifugao Governor Jerry Dalipog ti maysa nga executive order para iti temporary lockdown ti pannakaisserek dagiti sibibiag a baboy ken dagiti frozen meats ti probinsia.
Sigun met kenni Provincial Veterinarian ti Ifugao a ni James Gopeng, ipatpatungpalda ti executive order nag inpaulog ni Governor Dalipog ngem nupay kasta, inyunay-unayna a awan paylaeng ti nakumpirmar a kaso ti ASF ti nasao a probinsia.
Kinunana pay a nainget ti panangipatungplada ti checkpoint ti entry points ti probisia ti Ifugao.
Innayunna a nainget metlaeng ti koordinasyon nga isaysayangkatda kadagiti maseknan nga opisina sadiay tapno maliklikan ti pannakaisserek dagiti sibibiag a baboy nga apektado ti ASF.
