BAGUIO CITY – Ur-urayen paylaeng ti tallo a pasyente sadiay Bontoc, Mountain Province a nagpositibo iti COVID-19 UK variant ti resulta ti maikadua nga RT-PCR swab test dagitoy.
Sigun kenni Department of Health (DOH) – Cordillera Regional Director Dr. Ruby Constantino, agtaltalinaed paylaeng dagiti tallo iti maysa a quarantine facility sadiay Bontoc,.
Kinunana nga iti kaudian a datusda ket dumanon iti 18 ti kaso ti COVID-19 UK variant iti rehiyon Cordillera a bukbuklen ti 15 nga indibdiual sadiay Bontoc, Mountain Province ken tallo sadiay La Trinidad, Benguet.
Kinunana a dumanon ti 600 ti nabigbigda a nakapulapol dagiti nasao nga indibidual ken 345 ti nakakompleton iti isolation dagitoy bayat a manarimaan paylaeng ti panag-quarantine dagiti dadduma pay.
Kabayatanna, addan iti low risk level ti Cordillera kas maibasar iti daily attact rate ti rehion a dumanon iti 5.52%.
Maibasar iti datos, adda iti moderate risk level ti Kalinga ken Mt. Province, low risk level ti Baguio City, Benguet, Apayao ken Ifugao bayat a new normal level ti Abra.
Nupay kasta, kinuna ni Dr. Constantino a nasken a saan nga agpakampante ti publiko gaputa agtaltalinaed ti pangta ti COVID-19 kagiddan ti panngipettengna iti panagsurot iti minimum health standards kontra iti COVID-19.
