BAGUIO CITY–Nasuroken iti 5,000 ti bilang dagiti turista a nagrehistro iti VISITA platfom ti lokal a gobyerno ti Baguio kalpasan a naiwaragawag a saanen a maikalikagum ti negatibo nga RT-PCR test kadagiti indibidual nga agturong iti siudad.
Iti interview ti Bombo Radyo Baguio, kinuna ni City Tourism Officer Engr. Alec Mapalo nga apaman a nagwaras ti nasao nga impormasyon idi Martes ket dagus a nakailista ti nasao a website iti nasurok 2,000 nga aplikasyon dagiti turista nupay nagduduma ti aldaw a panagsang-atda.
Kinununa nga indikasyon daytoy nga iti laksid ti mapaspasaran a pandemya ket ado latta dagiti agtarigagay a sumang-at ken agpasyar ditoy City of Pines.
Iti baet daytoy, inyunay-unayna a saan nga ipangpangruna ti lokal a gobyerno ti panakaital-o ti turismo ti siudad ngem ketdi, ad-adda a maipangpangruna ti seguridad dagiti umili.
Gapu iti daytoy, inlawlawag ni Engr. Mapalo a naaramid ti VISITA platform para kadagiti turista tapno maamoan ti address ken transport details dagitoy kabayatan ti panagbakasyonda ditoy siudad para iti nalaklaka a contact tracing.
Inyulitna pay a kasapulan a dumalan dagiti turista iti triage apaman a makasangpetda ditoy siudad tapno maipasidong iti interview ken orientation kadagiti ditoy Baguio kontra iti COVID19.
