BAGUIO CITY – Inyunay-unay ti maysa a sigud a Board of Director ti BENECO a nasken a saan a maikompromiso ti panagserbi ti kooperatiba kadagiti member-consumers daytoy ti mapaspasamak ita a krisis iti management daytoy.
Iti panakiuman ti Bombo Radyo Baguio, inyunay-unay ni Counciulor Benny Bomogao a karbengan dagiti empleyado ti BENECO a mangipeksa iti pakaseknan dagitoy ngem nasken nga idalanda iti proper venue wenno babaen iti umno a wagas tapnu saan a masinga ti panangipaayda ti serbisyo kadagiti umili ti Baguio ken Benguet.
Maipalagip nga idi kalman ket nasuspindir ti trabaho iti headquarters ti BENECO sadiay South Drive ken nabarikadaan ti main entrance ti pasdek kasaruno ti panagturong sadiay dagiti Board of Administrators ti National Electrification Administration tapnu iserbi ti notice para iti panagtugaw ni Atty. Ana Maria Paz Rafael-Banaag kas baro a general manager ti kooperatiba.
Kinuna ti konsehal a nasken a maisimpan ti krisis iti management ti BENECO tapnu saan a maapektaran ti panakaipaay ti serbisyo publiko kas kadagiti panaka-asikaso dagiti apan agbayad ken dagiti addaan ti reklamo iti babayadan dagitoy.
Innayonna a saan a mangipaay iti pagsayaatan iti mismo a BENECO ken kadagiti member-consumers a pagserserbian ti kooperatiba ti saan a panangikankano wenno saan a panangakseptar dagiti empleyado ken dagiti opisyales ti kooperatiba iti nagbalin a desisyon ti National Electrification Administration (NEA).
Inyunay-unayna nga adda dagiti umno nga opisina a mabalin a pangikamangan dagiti empleyado ken dagiti opisyales ti kooperatiba iti panangkwestionarda iti nagbalin a desisyon ti NEA.
Kabayatanna, idi kalman ket inawat metten dagiti Board of Directors ti BENECO iti panangidaulo ni Atty. Esteban Somngi ti NEA RB Resolution 2021-71 a naipasa idi pay July 29, 2021 para iti panakadutok ni Atty. Rafael-Banaag kas baro a general manager ti kooperatiba.
Sigun kenni Atty. Somngi, talantanen ti board ti nasao a pakaseknan iti sesyon dagitoy inton Huwebes, September 2.
