Imbinglay ni Vice President Sara Duterte nga adda iti maysa a pagilian a nakasagana a mangawat kenni sigud a president Rodrigo Duterte kaspangarigan mapatgan ti nakiddaw nga interim release daytoy.
Iti panagbitla ni VP Sara iti dinar-ayanna nga event dagiti Pilipino idiay Japan, kinunana a daytoy ti mismo a nakipagnegosasyon kadagiti pagilian tapno makasarak daytoy iti mapagtalkan nga umawat kenni FPRRD nangruna ket kinunana nga awan iti namnamaenna iti pagilian a Pilipinas.
Nupay kasta, saanen a dinakamat ti bise presidente ti partikular a pagilian ngem impettengna a saan a ti Japan.
Immuna metten nga impakaammo iti Australia a saanna pinatgan ti nasao a kiddaw.
Maipalagip a ni sigud a president Duterte ket naarestar idi Marso ken iti agdama ket nakabalud iti International Criminal Court (ICC) detention center idiay The Hague, Netherlands gapu iti sangsangwenna a kaso a crime against humanity mainaig iti kampanya kontra iligal a droga ti administrasyonna.
