Naragsak nga imbinglay ni Atty. Julius Torres, Regional Director iti Commission on Elections- Cordillera nga amin a problema a napasaran iti automated counting machine kabayatan ti eleksyon ket dagus a narisut.
Iti panakiuman ti Bombo Radyo kenni Atty. Torres, saan a mailibak nga awan ti perpekto a system, adda nga adda iti complaints ket glitches a mapasamak.
Ngem, ti mayat a damag ket ti automated counting machine a naaramat ita nga eleksyon ket mas nasayaat ti performancena no idilig kadagiti makina a nausar idi napalpalabas nga eleksyon.
Sigun kenni Atty. Torres, ti kangrunaan a pakaseknan a napasaran iti automated counting machine ket ti scanner daytoy a marugrugitan gapu ta kadagiti marking pens a naaramat kadagiti balota a nabayag nga agmaga.
Gapu iti dayta, kasapulan a madalusan ti scanner wenno sakbay a mai-feed wenno maikarga ti balota iti makina ket nasken a dry daytoy.
Kinuna ti Regional Director ti Commission on Elections a sumagmamano a makina ti nagkaaberya ngem dagus a nasukatan dagitoy gapu ta nakasagana dagiti contigency machines.
Iti sabali a bangir, no maipapan iti transmittal ti resulta ti eleksyon, kinuna ni Atty. Torres a narigatan dagiti daduma a lugar no sadino saan a natungpal ti panggep dagitoy a maiproklama dagiti nangabak iti agsapa ti Mayo a trese iti agdama a tawen.
Sumagmamano a presinto ti nauray a nagtransmit iti resulta ti eleksyon a nangkasapaulan pay ti panaakaramat ti dua a chopper bayat a dagiti daduma ket kinasapulan a naiturong iti sentro ti lugar dagitoy.
Imbinglay ni Atty. Torres a ti kaudian a naupload ti resultana ket ti Calanasan, Apayao.
Iti laksid a naaramt ti starlink, narigatan ladta dagiti daduma a lugar a nangi-upload kadagiti resulta gapu iti sabali a terrain iti rehiyon ken ti problema iti communications wenno nakapsot a signal
Manamnama met nga inton tawen 2028 ket mas mapasayaat pay ti nasao a makina no daytoy ti maaramat manen.
