Napalawa ti search and rescue operation a maipatpatungpal tapno mabirukan ti 35-anyos a lalaki kalpasan a mapapati daytoy a nagaburan ken naiyanod iti creek sadiay Kias, Baguio City.
Ti nasao a biktima ket ni Jerry Watawat, 35 anyos, naasawaan, ken residente iti Purok Balligi iti nasao a barangay.
Iti panakiuman ti Bombo Radyo kenni Victor Benlingan, Barangay captain ti nasao a barangay, kinunana a nagturong ti nasao a lalaki iti garden dagitoy tapno sunduen ti amana.
Sigun iti kapitan, nasdaaw ti ama ti biktima nga awan ti anakna a nasangpetanna iti pagtaengan dagitoy.
Kinuna met dagiti kaarubada a kasla adda nakita-da a tao ngem saanda a sigurado no adda ti naiyanod.
Naireport met daytoy iti barangay a napanda kinita ngem awan ti nasarakanda rason a saan a dagus a naireport dagitoy kadagiti otoridad.
Nupay kasta, nagturong ti ama ti biktima iti barangay hall tapno agreport ken ditoy metlaeng a nakumpirmar a tao ti nakita dagiti kaaruba dagitoy a naiyanod.
Kabayatanna, impeksa ni Juluis Santos- Operation officer iti City Disaster Risk Reduction Management Office kinunana a nakitinulong ti kameng ti Philippine Military Academy, Philippine Air Force, Barangay Disaster Risk Reduction Management Office ken nag-augment metten ti City Disaster Risk Reduction Management Council para ti panakasapul ti biktima.
Sigun kenkuana nagudwa ti team dagitoy no sadino adda ti naideploy iti pababa iti karayan bayat a pasang-at met ti daduma.
Mangnamnama met dagitoy a saan pay a naiyanod ti biktima iti bued river gapu ta ti creek ket nakakonektar sadiay.//Bombo Noveh Organo
