BAGUIO CITY – Manamnama a maipasidong dagiti amin a meat vendors ken meat handlers iti siudad ti Baguio iti mamindua a seminar iti tinawen tapnu maipaayanda iti umdas a panaka-ammo kadagiti linteg mainaig iti negosyoda.
Kasaruno daytoy ti panangaprobar ti lokal a konseho ti Baguio iti ordinansa para iti panakaisayangkat ti semi-annual seminar para kadagiti amin nga agilaklako ken mangipoproseso ti karne ditoy siudad.
Mangnamnama ti awtor ti ordinansa a babaen kadagiti seminars ket makasuro dagiti meat vendors ken meat handlers tapnu maprebentaran ti panakamultada gapu iti panaglabsingda kadagiti kaskenan a linteg.
Maibasar iti imbentaryo ti Meat Market Monitoring Task Force, agarup nasuroken iti 300 dagiti agilaklako ti karne iti merkado publiko ti siudad ken ti nasao a bilang ket kapada ti bilang dagiti agilaklako ti karne iti ruar ti merkado publiko.
Panggep pay dagiti seminars a maallukoy dagiti amin a karaman iti meat business nga agtungpal kadagiti linteg ken pagalagadan.
Mairekrekomendar met ti panagmiembro dagiti amin a meat vendors, brokers ken meat handlers ditoy siudad iti meat-related association a maiparehistro iti Department of Labor and Employment.
Mailatang ti P250,000 kas training fund ken mairaman iti annual investment program ti City Veterinary and Agriculture Office.
Naisumitiren ti ordinansa iti opisina ti mayor para iti panagpirmana sakbay ti panag-epektibo daytoy.
