Inyebkas ni sigud a Presidential spokesperson Harry Roque idi kalman ti nariknana ti bang-ar iti panagtalinaedna idiay Netherlands kalpasan a nangipila iti asylum petition.
Ni Roque, a pagaammo kas human rights lawyer ken law professor sakbay a simrek iti politika ket nagkiddaw iti “asylum” wenno pagkamangan iti baet ti arrest warrant for contempt nga inruar ti House of Representatives gapu iti saanna a panagtabuno iti imbestigasionna kadagiti Philippine offshore gaming operators (POGOs).
Isuna pay ket mapapti a karaman kadagiti iligal nga aktibidad kadagiti POGO hubs sadiay Pampanga ken Tarlac, nupay dagitoy nga alegasion ket saan pay a nakadanon iti korte.
Imbutaktak ni Roque a sipud nga impaulog ti House of Representatives ti arrest warrant kontra kenkuana, naglimmeng daytoy iti nasurok nga innem a bulan.
