Kinumpermar ni Kingdom of Jesus Christ legal counsel a ni Atty. Israelito Torreon a nagbalin nga administrator ni sigud a Presindente Rodrigo Duterte iti amin nga assets ti supporter na a ni pastor Apollo Quiboloy.
Mainaig iti dayta, kinuna ni Atty. Torreon a masapul a pabassiten ti Kingdom of Jesus Christ ti panaggastosda agsipudta pinaatiddog ti Court of Appeals ti freeze order kadagiti bank accounts, real estate ken dadduma pay nga assets a nairehistro iti nagan ni Quiboloy ken ti Kingdom of Jesus Christ.
Maibasar iti Anti-Money Laundering Council (AMLC), napaattiddog ti freeze order agingga iti February 06, 2024.
Kayatna a sawen nga awan ti pondo para iti operasion ti Kingdom of Jesus Christ, ti simbaan daytoy, ti Jose Maria College ken law school daytoy, ti agtultuloy a pannakaibangon ti 75,000-seater a Kingdome ken dadduma pay a komersial nga establisimiento nga ipatpataray ti nasao a kongregasion.
Maipalagip a nangipaulog ti Court of Appeals iti baente nga aldaw a freeze order idi August 07, 2024 gapu iti kason a sexual exploitation; human trafficking ken financial smuggling a naipila kontra kenni Quiboloy ken ti uppat pay nga indibidual.
Kabayatanna, kinuna ni Philippine National Police Brigadier General Nicolas Torre III a no maipaay iti polis ti P10-milion a bounty a naikari para iti pannakatiliw ni Quiboloy ket agpapada a gatad ti bingay dagitoy.
Nupay kasta, iparit ti linteg ti pagilian dagiti polis, military personnel, kasta met ti asinoman nga empleado ti gobierno nga umawat iti reward money manipud iti estado.
