Naipila iti kamara ti singasing nga ‘Anti-kamote driving’ tapno paylaeng maprotektaran dagiti inosente a driver a maibalbalud uray awan met ti basol dagitoy iti napasamak nga aksidente.
Ti “Kamote Driver” ket mainaig kadagiti motorista a saan a naannad bayat ti panagpataray wenno panagmaneho dagitoy.
Sigun kenni Davao Oriental Representative Cheeno Almario, panggep daytoy a maisalbar dagiti inosente a driver a maibalbalud no sadino kasapulan nga adda ti maipakita a mangpaneknek iti nasao nga insidente kas iti CCTV wenno dashcam footage nga awan ti basol daytoy.
Nupay kasta, nagduduma met ti komento dagiti sumagmamano a motorista iti daytoy.
Saan met a nadakamat ti singasing no siasino ti mangikeddeng no rumbeng a maibalud wenno saan ti drayber.
Kabayatanna, sinuportaran daytoy ti 1-Rider partylist no sadino inwaragawagda nga adda ti bileg ti judicial system a mangbalbaliw iti agdama a sistema iti daytoy a banag.
Iti sabali a bangir, patien ti Automobile Association of the Philippines (AAP) nga adda iti korte a mangikeddeng no rumbeng a maibalud wenno saan ti tao a nairaman iti aksidente.
Innayon pay ti nasao a grupo nga adda ti bileg ti pulisya a mangimbestigar kadagiti nairaman iti aksidente.
