Ngumato iti P0.6450 tunggal kilowatt-hour (kWh) ti singir iti kuryente iti Benguet Electric Cooperative (BENECO) ita a bulan, rason tapno dumanon iti P12.2900/kWh ti residential rate.
Sigun iti BENECO, ti panagngato ket gapu iti agtultuloy a nangato a presio iti kuryente a gatgatangen daytoy manipod iti Wholesale Electricity Spot Market (WESM), nga agsupsuplay iti agarup 52% iti pakabuklan a kasapulan iti kuryente iti kooperatiba iti nasao a billing period.
Ngimmato iti P1.0610/kWh ti average a presio iti kuryente manipod iti WESM, bayat a manaynayunan met iti P0.0487/kWh ti singir manipod iti Therma Luzon, Inc. (TLI).
Nupay kasta, namnamaen iti BENECO nga in-inut a sumayaat ti generation coast iti panagrugi iti baro a Power Supply Agreement daytoy iti Masinloc Power Partners Co. Ltd. (MPCL) inton Hulio 2026.
Sigun kenni BENECO General Manager Melchor Licoben, makatulong ti baro a pagtataudan iti suplay tapno makessayan ti panangdepende iti panagbaliw iti presio iti WESM ken mangipaay iti nasayaat a balor iti kuryente kadagiti sumaruno a bulan.
Namnamaen ti kooperatiba a marikna ti epekto daytoy mangrugi iti billing cycle iti Setyembre 2026.
Inlawlawag metlaeng iti BENECO a saan a nagbaliw manipod pay idi tawen 2009 ti Distribution, Supply and Metering (DSM) charges ken Reinvestment Fund for Sustainable Capital Expenditures (RFSC).
Kinunana a dagitoy ket bukbuklen laeng iti 10 agingga 14% iti pakabuklan a mabayadan iti kuryente, bayat a ti nabatbati a singir ket maipasa laeng kadagiti power supplier, transmission provider, ken dadduma pay a maseknan nga ahensia.
Ginuyugoy met iti BENECO dagiti konsyumer nga agtipid iti panagaramat iti kuryente babaen iti panagkitada kadagiti makonkonsumo, panagaramat iti energy-efficient appliances, ken panangliklik iti nakaro a panagaramat iti kuryente nangruna iti oras iti nangato a demand.
nangliklik iti nakaro a panagaramat iti kuryente nangruna iti oras iti nangato a demand.
