Impeksa ni Atty. Julius Torres, Regional Director ti Commission on Elections Cordillera a maaramat ti Starlink, maysa a satellite network kadagiti nagduduma a lugar iti rehiyon Cordillera nga awanan iti telecommunications signal para iti umadanin a 2025 National ken local Elections
Iti panakiuman ti Bombo Radyo kenni Atty. Torres, ti nasao a satellite network ket maaramat para laeng iti panangipatulod kadagiti resulta ti eleksiyon.
Nupay kinuna ni Atty. Torres a mas ad-adu dagiti lugar iti rehiyon Cordillera a saan nga agparikut ti signal, adda latta dagiti sumagmamano a lugar iti rehiyon nga awanan iti telecommunications signal partikular iti probinsya ti Ifugao ken Mt. Province nu sadino idi napalabas nga eleksyon ket kinasapulan dagitoy nga inbiyahe dagiti Counting Machines kadagiti municipal centers nga addaan iti telecommunications signal tapnu ma itransmit dagiti resulta ti eleksiyon.
Innayon pay ni Atty. Torres a daytoy ti maysa a kangrunaan a parikut a makitkitana kadagiti nagduduma a voting centers iti nasao a rehiyon.
Maipalagip nga iti naipatungpal a Regional Joint Security Control Center wenno RJCC iti siyudad ti Baguio idi napalabas a bulan ket impeksa ti Philippine National Police a ti komunikasyon ti makitkitada kas maysa a karit para iti umadanin a National ken Local Election inton Mayo a dose ita a tawen.//Bombo Genzel Depayso
