BAGUIO CITY – Nakanselar dagiti sumagmamano a bookings dagiti turista kadagiti accommodation establishments ditoy syudad ti Baguio.
Inlawlawag ti Hotel and Restaurant Association of Baguio (HRAB) spokesperson Andrew Pinero nga adu dagiti rason iti nasao a kanselasyon dagiti bookings.
Sigun kenkuana, maysa ditoy ti panakalimitar ti bilang dagiti turista a sumrek ditoy syudad.
Kinunana a maysa pay a rason ti panagngato ti kaso ti COVID-19 sadiay Metro Manila.
Dinakamatna a gapu kadagitoy ket mapattapatta a dumanon iti minilyon a pisos ti mapukaw manipud iti namnamaenda kuma a mapastrekanda manipud kadagiti nasao nga accommodation bookings dagiti turista.
Maipalagip nga ituloy latta ti lokal a gobyerno ti Baguio nga agawat kadagiti turista nga agparehistro nupay nalimitaran manen ti bilang dagiti innaldaw a mapastrek iti siudad.
