BAGUIO CITY – Napukawan iti kuryente iti nasurok maysa oras ken 30 minutos ti sumagmamano a paset ti Baguio City ken Benguet a masaksakupan ti Lamut Substation ti Benguet Electric Cooperative (BENECO) gapu paylaeng iti Manual Load Dropping (MLD) ti National Grid Corporation of the Philippines (NGCP).
Iti panakiyuman ti Bombo Radyo kenni Eric de Guzman, Community Relations Officer ti BENECO, kinunana a nakaawatda iti tawag idi malem kalman manipud iti NGCP seknan iti panakairaman ti Lamut Substation ti kooperatiba iti nasao nga MLD.
Nangrugi ti panakaiddep ti kuryente iti alas tres agingga iti alas-kwatro trenta idi malem kalman a nakaapektaran ti 20-30 porsiento ti member-consumers ti kooperatiba iti Baguio ken Benguet.
Inlawlawagna a maysa nga istratehiya ti NGCP ti panangisayangkat ti rotating power outage wenno panangiddep ti kuryente dagiti nagduduma a kooperatiba iti las-ud ti maysa nga oras tapnu mai-stabilize ti suplay ti kuryente iti Luzon Grid.
Imbingayna a kadagiti napalpalabas a tawen ket naapektaran metlaeng iti MLD ti BENECO.
Inyunay-unay ni De Duzman a ti panakaiddep ti kuryente ket saan a gapu iti agkurkurang ti suplay ti BENECO ngem ketdi gaput iti agkurkurang a suplay ti kuryente nga iserserek dagiti hydropower plants iti Luzon Grid.
Sigun kenkuana, kadawyan a bumasbassit ti suplay ti kuryente tunggal summer gaputa saan a 100% ti operasyon dagiti hydropower plants iti entero a pagillian gapu iti panagbassit met ti danum.
