Imbinsa-binsa ni Dionisio Dennis ti baro a Presidente ti Baguio Correspondents and Broadcasters Club (BCBC) ti tarigagay dagitoy a proyekto para iti pagsayaatan ti nasao a club.
Iti pannakiuman ti Bombo Radyo kenkuana, kinunana a maysa a pangpanggepen dagitoy ket ti pannakapabaro manen ti media camp sadiay Camp Pepot tapno napinpintas a maaramat.
Malaksid iti dayta, panggep metlaeng dagitoy a mangipatakder iti bukod nga opisina ti nasao a club agsipud ta awan paylaeng ti bukod nga opisina a maaramat.
Gapu iti dayta, ti kitkitaen dagitoy a pangipasdekan ket ti sigud nga opisina ti Criminal Investigation and Detection Group (CIDG) sadiay Melvin Jones Grandstand.
Kinunana met a pinalubusan daytoyen ni Baguio City Mayor Benjamin Magalong rason posible a makipagsinnarak dagitoy kenni Atty.Rhenan Diwas para iti kanayunan a dokumento.
Innayonna pay a maysa metlaeng a panggep dagitoy ket ti pannakaipaay iti accidental insurance para kadagiti miembro ti nasao a club.
Iti sabali a bangir, manamnama metlaeng nga agtataripnong dagitoy inton Marso tapno mapagtatalantanan ti mapadpadaanan met a panangpili kadagiti lucky summer visitors iti siudad.
