BAGUIO CITY – Saan pay a kabaelan ti munisipyo ti La Trinidad, Benguet a mang-akomodar kadagiti turista iti baet nga aglukaten ti turismo iti kabangibang daytoy a siudad ti Baguio.
Inaklon daytoy ni Mayor Romeo Salda iti panakiyuman ti Bombo Radyo Baguio kagiddan ti panangkunana a nainget nga ipawilda paylaeng ti panagturong dagiti turista iti masakupanda nga ili nangruna dagiti agtaud iti sabali a rehion.
Dinakamatna a masapol pay a mangipatungpalda iti dry-run ti panakailukat dagiti nagduduma a destinasyon iti munisipyo kadagiti residente.
Sigun kenkuana, babaen iti daytoy ket maadal nga umno no kabaelan ti La Trinidad a mangakomodar kadagiti turista iti kanito a mailukat dagiti kangrunaan a pagpasyaran sadiay iti baet ti agtultuloy nga epekto ti COVID-19 pandemic.
Imbinglayna nga iti kanito nga aglukat ti turismo ti La Trinidad ket sumagmamano laeng kadagitoy ti ilukatda kas iti Avong ni Romy sadiay Wangal ken ti Mt. Costa ken Mt. Kalugong.
Dinakamat pay ni Mayor Salda a ti panakaipatungpal ti dry-run inton Sabado nga ekslusibo para kadagiti residente ti La Trinidad.
Inlawlawagna a sakbay nga agturong dagiti residente kadagiti nadakamat a lugar ket masapol pay a mangalada iti special pass manipud iti barangay ken health certificate manipud kadagiti maseknan nga ahensia ti gobierno.
