BAGUIO CITY – Maim-imbestigaran iti agdama dagiti naipadamag a sumagmamano a water delivery services a nangipangato iti presyo ti tunggal drum ti danum ditoy siudad.
Sigun kenni Mayor Benjamin Magalong, naipaayan dagiti kameng ti pulisya ti direktiba a mang-imbestigar iti nasao nga isyu para iti dagus a panakaipila ti kaso nga overpricing kadagiti naglabsing a water delivery firms.
Immunan nga inwaragawag ni Mayor Magalong a maiparikep dagiti water delivery firms/services nga agsingsingir iti nangato a presyo ti danum tunggal drum.
Apela pay ti Mayor kadagiti agreklamo a residente nga ipaayda ti kaskenan nga impormasyon tapno nalaklaka a masarakan dagiti delivery services nga agsingsingir iti nangato a presyo ti danum.
Palpalagipanna met dagiti kustomer a maipawil a mangidiaya iti nangato a bayad kadagiti delivery firms tapno laeng nasapa a maideliveran dagitoy ti danum.
Daytoy ti makitkita a maysa a rason ti panagsingir dagiti sumagmamano a water delivery services ti nangato a presyo ti tunggal drum kadagiti customer-da.//Bombo Jez Lapizar
