BAGUIO CITY – Agrekreklamo dagiti sumagmamano a vendors a saan a naipaayan ti puesto iti Session Road in Bloom idiay Session Road, Baguio City.
Sigun kenni Andrew Pinero, panakangiwat ti Baguio Flower Festival Foundation Inc. (BFFFI), panggepda nga i-akomodar amin dagiti vendors nga interesado a makipaset iti Session Road in Bloom ngem limitado laeng ti espasyo a naipaay.
Inlawlawagna a kasapulan metlaeng a dumalan dagiti vendors iti umno a proseso tapno mairamanda iti nasao nga aktibidad.
Nupay kasta, al-allukoyenna dagiti vendors a saan a naipaayan ti gundaway a makipasetda iti Session Road in Bloom inton sumaruno a tawen.
Kabayatanna, impasigurado ni Pinero a naing-inget ti panagbantayda kadagiti vendors maipapan iti food handling.
Kasaruno daytoy ti naipatungpal nga screening ken panakapili dagiti nagududuma a produkto a maidisplay iti nasao nga aktibidad.
Iti agdama, dumanon iti agarup tallo gasut a booths ti naipatakder iti Session Road in Bloom ita a tawen.//Bombo Jez Lapizar
