BAGUIO CITY – Naduktalan ti Department of Social Welfare and Development (DSWD)-Cordillera dagiti sumagmamano nga insidente a mangdiskwalipikar kadagiti nailista a benipisaryo ti Social Amelioration Program (SAP).
Iti interview ti Bombo Radyo – Baguio kenni DSWD-Cordillera regional director Leo Quintilla, kinunana a manarimaan ti post-validation ken cross matching dagitoy iti listaan dagiti benipisaryo tapnu maipasigurado a nadalus daytoy para iti maikadua a rikos ti panakaiwaras ti SAP.
Imbutaktakna nga adda ti nadiskobreda a maysa a pamilya nga addaan dua a miembro a nakaawat ti SAP bayat nga adda met ti nadiskobreda a nailista iti dua a barangay.
Naduktalanda pay nga adda dagiti sumagmamano a barangay officials ken empleyado ti gobyerno a nairaman iti listaan dagiti benipisaryo ti SAP.
Kinunana a maimbestigaran dagiti nasao nga insidente tapnu saandan a mainayon iti maikadua a rikos ti SAP ken mapagpalawag dagiti maseknan a lokal a gobyerno no apay a nainayon iti SAP dagiti saan a maiparbeng.
Inlawlawag pay ni Director Quintilla a dagiti laeng barangay volunteers kas iti day care workers, barangay health workers ken street sweepers a makaaw-awat iti bassit nga honorarium ti mabalin a mainayon iti SAP ngem maipawil dagiti nadutukan wenno nabotosan nga opisyal ti gobyerno ken dagiti addaan kontrata iti gobyerno a susuwelduan ti gobyerno.
