Impakaammo ni Mar Santos, Weather Observer iti Philippine Atmospheric, Geophysical and Astronomical Services Administration (PAGASA)-Baguio, a saan paylaeng a maideklara ti summer season iti Pilipinas.
Iti pannakiuman ti Bombo Radyo kenkuana, kinunana a saan paylaeng a nalpas ti Northeast Monsoon rason a saan paylaeng a maideklara ti summer season.
Nupay kasta, kinunana a maibasar iti datos dagitoy ket posible a maideklara ti summer season iti maudi a bulan ti Pebrero wenno bayat ti panagrugi ti bulan ti Marso.
Impettengna metlaeng nga iti kanito a mapasaran ti nasao a season ket dagus metlaeng nga ideklara daytoy ti Geophysical and Astronomical Services Administration (PAGASA).
Kabayatanna, nairekord dagitoy ti kabaraan a temperatura ita a tawen iti siudad ti Baguio a dumanon iti 27 degree celcius idi laeng kalman.
Nababbaba daytoy no idilig iti kangatuan a temperatura a 30 degree celcius a nairekord iti siudad ti Baguio idi napalpalabas a tawen.
Kagiddan dayta, nagpalagip daytoy iti publiko nga agtalinaed a hydrated babaen iti kanayun a panaginum iti danum kasta metten nga agbalin a naridam kadagiti impormasyon seknan iti sasaaden ti panawen.
