BAGUIO CITY – Manarimaan ti imbestigasyon dagiti otoridad iti pakabigbigan ti suspek a nangpapatay iti maysa a baro sadiay Betag, La Trinidad, Benguet itay laeng nabiit.
Immunan a nabigbig ti biktima a ni Lenard Cadosa Pia, 20-anyos, laborer, agnanaed iti warehouse ti pagtatrabahuanna sadiay Betag, La Trinidad, Benguet ken tubo ti San Miguel, Cagyan.
Maibasar iti imbestigasyon, nagi-inom ti suspek, ti biktima ken dadduma pay a kadua iti nasao a lugar ken ditoy a naaddaan dagiti dua iti saan a panagkinna-awatan a nagresulta iti panag-apa dagitoy.
Inruar ti suspek ti imetna a kutsilyo ngem inanawa dagitoy dagiti kakaduada.
Nagturong ti biktima iti warehouse tapno maturog bayat naturog dagiti dadduma pay a kakadwada iti barracks dagitoy.
Nagturong met ti uliteg ti biktima iti warehouse a naturuganna ngem sadiay a nakita daytoy ti biktima a nakadasay ken dara-dara.
Dagus nga inyuman ti uliteg ti biktima iti pulisya ti nasangpetanna ken iti panagresponde dagiti pulis ken ti crime laboratory ket naduktalan a pimmusayen ti biktima.
Nasarakan pay iti nasao a warehouse ti maysa a dara-dara a buneng ken naduktalan a nagsagrap ti biktima kadagiti tagbat iti paset ti tengnged ken ulo daytoy. (with Bombo Florence Paytocan)
