![](https://img.bomboradyo.com/baguio/2023/01/324183531_722881352537534_7132914130322335185_n.jpg)
ABRA- Nainget ti panagbirok dagiti otoridad iti suspek ti panakapapatay ti maysa a Vietnamese national sadiay San Isidro, Bangued, Abra.
Nabigbig ti biktima a ni Vo Tien Dung, 48-anyos, businessman manipud Barangay Bangbangar. Nabigbig ti biktima babaen iti badona.
Sigun iti report, naduktalan ti dua nga studyante ti bangkay ti biktima iti igid ti kalsada sadiay Barangay San Marcial, idi Desyembre 31, 2022.
Immunan a naireport a mapukpukaw ti biktima idi Desyembre 28, 2022.
Sigun iti attending pathologist, pimmusay ti biktima gapu iti nasagrapna daytoy a panakabekkel, sugsugat iti nagduduma a passet ti bagi na pakairamanan ti maatap a sugat a nagtaud manipud iti panakabagsol wenno panakapaltog.
Iti agdama, agtultuloy ti imbestigasyon dagiti otoridad iti nasao nga insidente.
Kabayatanna, iti asinoman nga adda ti impormasyonna iti nasao nga insidente, mabalin nga itawag iti San Isidro Police babaen iti numero a 09776587416 wenno 09989674316.//Marjorie Salting