Kidkiddawen ti Dolores, Abra Municipal Police Station ti tulong dagiti umili nangnangruna dagiti residente ken establishemento nga addaan ti CCTV para ti naparpartak a panangresulba ti kaso ti pammaltog ti maysa a driver iti nadakamat a munisipyo.
Sigun ti Officer-in-charge ti Dolores Municipal Police Station a ni Police Major Harold Alagao, agtultuloy ti imbestigasyon dagiti kameng ti pulisya tapno maamuan ti kinasyasino ti adda iti likodan ti pammaltog.
Innayon pay ti hepe nga adda ti nasarakan da a sling bag nga addaan karga a paltog iti rangkis nga asideg iti crime scene ket naipatulod daytoy iti Forensic Investigation Unit para iti naan anay nga imbestigasyon.
Sigun pay ti mangidadaulo ti Dolores MPS, addan ti makitkita dagitoy a person of interest maibasar kadagiti statement ti sumagmamano a witnesses ngem kasapulan latta ti naan anay nga ebidensya mainaig ti insidente.
Maipalagip nga idi Martes ti malem, nasarakan ti dara dara a bagi ti biktima ti maysa a paset ti kalsada sadiay Talogtog, Dolores. Naitaray daytoy iti hospital ngem naideklara met laeng a Dead on Arrival babaen ti attending physician.
Narekober iti crime scene ti siyam a kapsula ti 9mm, maysa a kapsula ti calibre 45, ken maysa a buli ti calibre 45.
Kabayatanna, naisangpeten ti bangkay ti biktima iti pagnanaedan na sadiay Kimmalaba, Dolores, Abra tattay bigat.
Impanamnama met ti Dolores MPS ti panagpatrolya da iti lugar tapno mamintinir ti linak ken kapia ti nasao nga lugar. // RK Bantiding
