BAGUIO CITY- Mangnamnama ti Baguio City Sports Office a pundoan ti lokal a gobierno dagiti project proposal dagitoy para iti agtultuloy a pannakapapintas ken pannaka upgrade dagiti pasilidad partikular ti swimming pool area iti Baguio Athletic Bowl.
Iti panakiyuman ti Bombo Radyo kenni City Sports and Coordinating Officer Gaudencio Gonzales, nagkiddaw dagitoy iti nasurok 10 million pesos a pondo iti lokal a gobierno para iti panakasukat dagiti nabayagen a heat pumps iti swimming pool area.
Iti agdama ket adda laeng ti tallo a heat pumps a maar-aramat para iti olympic size swimming pool ken kasapulan a masukatanen dagiti daan tapno adda ti naan-anay a mangpapudot iti danum a mangipaay iti natalged a paglangoyan dagiti atleta ken swimming enthusiast.
Malaksid iti daytoy, maur-uray metten ti pannaka aramid ti dug-outs
dagiti swimmers ken coaches a napundoan iti nasurok 11 million pesos.
Innayon pay ni Gonzales nga agrugi ti normal nga operasyon ti nasao a pasilidad intun sumaruno a bulan ken ditoy metten nga agsubli ti regular a panagsanay dagiti atleta.//Jordan Tablac
