BAGUIO CITY – Impaikkat ti kontraktor ti naimuntar a tactiles iti deppaar ti Father Carlos Street ditoy siudad ti Baguio.
Sigun iti foreman ti proyekto, daytoy ket kalpasan nga adda dagiti naireport iti panaka-aksidente sadiay a nagresulta iti panakasugat ken panaka-ospital dagiti maseknan.
Tinagiragsak met dagiti visually-impaired individuals a magmagna iti nasao a disso ti panakaikkat dagiti tactiles.
Sigun kadakuada, daytoy ket gaputa awan ti nariknada a nagdumaanna idi sakbay ken kalpasan a naimuntar dagiti tactiles malaksid pay a maliklikan ti panaka-aksidente dagiti magmagna sadiay.
Inlawlawag met ni City Administrator Bonifacio Dela Peña a napagnumuan ti DPWH-Cordillera, DWPH-Baguio ken ti City Engineering Office ti panakaikkat dagiti tactiles a mabalin a ma-disassemble.
Nupay kasta, kinunana a dagiti permanenten a naimuntar iti kalsada ket agtalinaed iti agdama bayat nga ikonkonsidera dagiti ahensia dagiti mabalin a maaramid kadagitoy.
Kagiddan iti daytoy, impeksana ti panagbabawina iti nagbalinan ti panakaimuntar dagiti tactiles gaputa ti intension dagitoy ket makatulong ken saan ketdi a mangdangran.
