BAGUIO CITY – Naawaten dagiti tallo a barangay kapitan iti siyudad ti Baguio ti summon manipod iti Land Transportation Franchising and Regulatory Board (LTFRB-Cordillera) gapu iti panangipalubosda iti temporaryo a panakaipangato ti plete iti jeep iti masakupanda a barangay.
Karaman kadagiti palpalpalawagen ti LTFRB-CAR ket dagiti barangay kapitan iti Barangay Camp 8, Poliwes ken San Vicente.
Iti interview ti Bombo Radyo Baguio kenni Barangay Kapitan John Alban ti Barangay Poliwes, kinunana nga naituding inton bigat ti umuna nga hearing dagitoy.
Innaklonna nga adda ti napagnunumuanda kadagiti asosasyon ti drivers ken operators iti jeepney seknan iti temporaryo a panakaipangato iti plete dagiti residente sadiay kalpasan a nagpangta dagiti drivers a saandan nga agbiyahe gaputa awan ti kitada iti nuebe (9) pesos a plete ti tunggal pasahero malaksid a naksayan ti capacity a nasken nga ilugan dagitoy.
Gapu iti daytoy,nangaramidda iti Memorandum of Agrement(MOA) tapnu temporaryo paylaeng a maipangato iti pamasahe dagiti amin nga pasaheros sadiay tapnu awan iti rason nga sumadut dagiti drivers ken operators iti jeepney nga igbibiahe.
Nakalanad iti MOA a kinse pesos ti pamasahe dagiti regular a pasaheros bayat a dose met ti pamasahe dagiti senior citizen ken persons with disabilities(PWDs).
Inlawlawag ti nasao nga kapitan nga daytoy ti pinanunotda a wagas tapnu saan a marigatan dagiti constituents iti masakupanda a barangay nu bilang saanen nga agbiahe dagiti jeepneys sadiay.
