Natiliw ti Philippine National Police – Criminal Investigation and Detection Group (PNP-CIDG) ti tallo a lallaki a mapapati a nangipaay kadagiti kandidato iti “sure win” iti lokal nga eleksion a kasukat ti minilmilion a pisos.
Nakemmeg dagiti lallaki iti maysa nga entrapment operation bayat nga ipapaayda kadagiti agama, a kandidato iti loka a puesto, a manggarantiya iti panagballigida iti eleksion 2025 a kasukat ti P90 million.
Nagpabigbig dagiti suspek kas eksperto ti information technology (IT).
Kinunada pay nga adda koneksionda iti Commission on Elections (Comelec) ken kayada a manipulaen ti resulta ti eleksion.
Sigun kenni Police Brigadier General Nicolas Torre III, PNP-CIDG acting director, adda ti opisinada a naduktalan, ngem patienna a saanda a kaya a mang-hack iti server ti Commission on Elections.
Pinaglibakan met ti nadakamat nga ahensia nga adda koneksionda kadagiti nakemmeg a suspek.
Kabayatanna, imbalakad ti Commission on Elections kadagiti kandidato nga aramatenda dagiti pondoda kadagiti kampania, imbes nga unaenda dagiti scams.
