Nawayawayaanen ti tallo a Pilipino nga agtutubo a nakipaset iti saan nga otorisado a protesta idiay Qatar idi napalabas a lawas, bayat a sangapulo ket innem a dadduma pay ti naibalud iti agingga tallo a tawel nu mapaneknekan dagiti otoridad a naglabsingda iti linteg kontra iti panagprotesta.
Daytoy ket manipod iti maysa nga opisial ti Department of Foreign Affairs (DFA) idi kalman.
Dumanon iti sangapulo ket siam a Pilipino ti nakemmeg idiay Qatar idi napalabas a lawas kalpasan a nangisayangkat dagitoy iti protesta seknan iti pannakakemmeg ni sigud a President Rodrigo Duterte.
Kinuna ni DFA Undersecretary Eduardo de Vega a dagiti nawayawayaan ket dagiti menor de edad ken agtutubo.
Iti sidong ti Qatar’s Law No. 18 of 2004, dagiti saan a naotorisaan a protesta ken demonstration ket iligal, nu sadinno kasapulan ti panagaprobar manipod iti gobierno.
Mangnamnama ti DFA nga amin a 16 a Pilipino ket mawayawayaan iti sumaruno a lawas wenno sumarsaruno a lawas ken mamultada laeng imbes a maidarumda iti kaso, sigun ni De Vega.
