BAGUIO CITY – Nakaawat ni Itogon Mayor Victorio Palangdan iti surat manipud kenni Cordillera PNP regional director B/Gen. Israel Ephraim Dickson a mangipakpaka-ammo iti panagturong sadiay ti DENR-Task Force Mining Challenge tapnu ipasardeng ti operasyon ti small scale mining iti masakupan ti munisipyo.
Iti panakaiyuman ti Bombo Radyo, kinuna ni Mayor Palangdan a nabiag manen ti nasao a task force kalpasan a nagsurat ti Benguet Corporation iti Regional Law Enforcement Coordinating Committee para iti panakaipasardeng ti amin a panagminas sadiay Itogon partikular iti Antamok, Balatoc, Acupan ken Gumatdang.
Nupay kasta, kinunana a gapu iti danagna a maawanan manen iti pagbiagan dagiti adu a minero sadiay Itogon ket kinasaritana ni Dickson para iti panagtaripnongda.
Naangay ti umuna a taripnongda idi Martes ken adda manen ti maysa pay a taripnongda para iti panakabigbig dagiti napeggad a disso nga addaan operasyon ti panagminas a kasapulan a maipasardeng.
Fish Kill
Innayon ti mayor a naan-anay nga impasardengnan ti operasyon dagiti agipoproseso ti balitok iti deppaar ti Antamok River ken Ambalanga River kalpasan a napasaran ti fish kill sadiay Barangay Tinongdan.
Atapen dagiti residente ti Barangay Tinongdan a dagiti kemikal nga agtataud iti dua a karayan ti nakatayan dagiti taraken nga ikan dagitoy.
Inyunay-unay ni Mayor Palangdan a naibilin ti panagaramid dagiti minero iti dam a pakaurnongan dagiti rugitda tapnu saan nga agdiretso iti karayan ngem saan a nagtungtungpal dagiti maseknan.
Gapu iti daytoy, inkarina ti panakakemmeg ken panakakumpiskar dagiti amin a kagawaan iti panangiproseso iti balitok dagiti sulpeng a minero a saan nga agtungtungpal kadagiti pammilin ken balakad.
Environmental Protection
Kabayatanna, inyunay-unay ni Mayor Palangdan ti panakaipangruna ti panakasalaknib ti aglawlaw ti munisipyo manipud iti ad-adda a panakadadael daytoy.
Kinunana a kasapulan ti environmental protection no kayat pay dagiti umili ti Itogon a mamintinir nga adda paylaeng ti munisipyo.
Dinakamatna a maysa a mangdaddadael iti nakaparsuaan ti panangibelleng dagiti minero iti rugit dagiti nagalaanda iti balitok kadagiti karayan a mangituntunda met iti panakasabidong ti karayan ken dagiti ikan a matartaraken kadagitoy iti sumagmamano a paset ti munisipyo kas sadiay Tinongdan.
Innayon ti mayor a napimpintas a maipasardeng ti operasyon dagiti small scale miners no patayen met dagitoy ti pagbiagan dagiti padada a residente ti Itogon babaen iti panangsabidongda kadagiti karayan.
Naamuan a nagala metten ti Bureau of Fisheries and Aquatic Resources iti sample dagiti natay a tilapia ken danum iti nakailistaan ti fish kill sadiay Tinongdan, Itogon a maatap nga intunda dagiti kemikal nga imbelleng dagiti minero iti Antamok River ken Ambalanga River.
Iyap-apela manen ni Mayor Palangdan ti panagtitinnulong dagiti amin nga umili ti Itogon tapnu saan a madadael ti munisipyo gaputa sigun kenkuana ket mabalin pay a maispal ti ili dagitoy.
