Imbinglay ni Edgar Madlaing,Regional Sports Coordinator iti DepEd Cordillera a high spirit a makiballubal ti bunggoy ti rehion Cordillera iti manarimaan a 2025 Palarong Pambansa sadiay Laoag City, Ilocos Norte.
Iti pannakiuman ti Bombo Radyo kenkuana, imbinglayna ti nabara a panangpasangbayda kadakuada bayat ti panagsangpetda sadiay itay nabiit.
Kinunana a nagasat ti bunggoy ti Cordillera agsipud ta napintas ken nasayaat dagiti billeting areas a nagdagusan dagitoy no sadino adda dagiti naisagana a pagturoganda ken dadduma pay.
Imbinglay metlaeng ni Madlaing nga adda dagiti naituding a van ken jeep a binulod dagitoy kadagiti nagduduma nga Schools Division Office nga aramaten dagitoy a mang-itulod kadagiti balon dagiti atleta nga agay-ayam.
Sigun kenkuana kasapulan a maibalonan dagiti atleta nangruna no manarimaan ti ay-ayam dagitoy tapno saanda a madisturbo.
Kabayatanna, nagyaman met daytoy kadagiti amin a nangsuportar ken agtultuloy a mangipapaay iti tulong kadakuada bayat ti nasao nga ay-ayam.
Kiddawna metlaeng ti agtultuloy a kararag ti tumunggal maysa tapno agballigi dagitoy agingga nga agleppas ti 2025 Palarong Pambansa.
