BAGUIO CITY – Temporaryo a nasuspindir ti trabaho dagiti opisyales ken empleyado iti Municipal Hall ti Atok, Benguet, epektibo ita nga aldaw, August 11.
Nailanad iti Executive Order No. 33, series of 2020 ni Atok Mayor Raymundo Sarac nga idi rabii ket nakaawat daytoy iti kiddaw manipud iti Municipal Health Officer para iti panakaisayangkat ti disinfection iti amin a pasdek ti Municipal Hall pakairamanan ti aglawlaw daytoy kas iti Paoay Barangay Hall ken iti municipal public market sadiay Sayangan, Barangay Paoay.
Kinunana a maysa ti disinfection kadagiti kasapulan nga addang tapnu maprebentaran ti ad-adda a panagwaras ti COVID-19.
Gapu iti daytoy, awan pay ti trabaho ken aniaman a transaksion iti Municipal Hall, pakairamanan ti Municipal Health Office a masarakan sadiay Camp 30, Barangay Caliking.
Nasuspindir metlaeng ti panangited ti Municipal Health Office iti medical clearance ken health declaration ken ti Mayor’s Office iti travel pass.
Temporaryo met a mairikep amin a pasdek ti negosyo manipud iti Mount Olives Merchandise and Furniture agingga iti aglawlaw ti Midway.
Imbalakad ni Mayor Sarac kadagiti residente ti Paoay a mabalinda nga agala ti health declaration manipud kaasitgan a barangay iti pagnanaedanda ngem daytoy ket para kadagiti addaan iti napateg unay a panagbiahe.
