BAGUIO CITY – Maak-akusaran ti gobyerno ti United Kingdom iti panagbalin daytoy a naannad unay iti panag-aksion kontra iti outbreak ti COVID-19, saan a kas iti dadduma pay a pagilian.
Nupay kasta, iti interview ti Bombo Radyo Baguio kenni Bombo International Correspondent Marben Tanacio Orfiano a tubo ti Itogon, Benguet ken agtatrabaho kas medical technologist wenno biomedical sientist iti Homerton University Hospital sadiay East London, inlawlawagna a science-based ti wagas ti gobyerno ti UK nga agaksion kontra iti COVID-19.
Kinunana nga ammo ti gobyerno ti UK a ti COVID-19 ket baro a sakit a saanda a kabaelan a naan-anay a mapaksiat wenno maagasan isut gapuna a ti ar-aramiden dagitoy ket itantanda ti panagbalin a full-blown ti kaso tapnu makabiruk ti National Health Service iti wagas tapnu maremedyuan ti nasao a sakit.
Dinakamatna a mangipaluspos ti gobyerno ti UK iti 330-B pound a katukad ti agarup 20.2-T pesos kas suporta kadagiti negosyo ken umili sadiay nga apektado iti COVID-19 bayat a naipaayan iti tallo a bulan a pawayway dagiti addaan ti mortgages tapnu saan a marigatan dagitoy nga agbayad.
Imbingay pay ni Orfiano a kitkitaen ita ti gobyerno ti UK ti posibilidad a mapasubli dagiti retirado a tattao sadiay manipud iti medical field tapnu agserbi kas frontliners iti laban kontra COVID no pagkasapulan.
Dinakamatna metlang a mapaspasaran ita ti trapiko sadiay nga intunda ti social distancing kalpasan a mas pinili dagiti tattao ti agmaneho iti bukodda a lugan ken manmanon dagiti aglugan iti parapubliko a transportasyon.
Kabayatanna, imbingayna met a kas maysa kadagiti frontliners iti panakaiproseso ken panaka-adal dagiti blood samples ken body fluids para iti diagnosis ken treatment ti COVID-19 ket saanna a naliklikan ti nagdanag wenno naalarma idi umuna a gundaway a makaawatda iti samples para iti COVID-19 testing.
Nupay kasta, kinunana nga awan ti rumbeng a pagdanaganna gaputa adda met dagiti maipatpatungpal a precautionary measures tapnu maprotektaran dagitoy manipud iti coronavirus.
