BAGUIO CITY – Patien ti ama ti Baguio City a ti B.1.1.7 wenno UK variant ken ti B.1.351 wenno South African variant ti COVID-19 ti dominante ita a variants ti nasao a sakit a maiwarwaras iti siudad kas maibasar kadagiti scientific evidences iti panakaiwaras dagiti nasao a variants.
Immuna iti daytoy, kinumpirmar ti Philippine Genome Center (PGC) ti panagpositibo iti 84 nga specimen iti UK variant ken ti panagpositibo ti 37 nga specimen iti South African variant.
Kinuna met ni City Health Services Officer Dr. Rowena Galpo a manipud iti 121 a kaso ti variants of concern ket innem ti pimmusayen kadagitoy bayat a naimbagan dagiti 115.
Sigun kenni Mayor Benjamin Magalong, maibaga nga addaanen ti siudad iti rinibribo a kaso ti UK ken South African variants iti napalabas a tallo wenno uppat a bulan nangruna ta nabayag ti panawen ti sequencing dagiti samples a naipatulod iti PGC.
Imbinglayna nga adda ti agina a nagpositibo iti UK variant ken South African variant nupay awanan dagitoy iti travel history.
Patienna a posible a kameng ti pamilya ti nangiyawid iti virus babaen iti local transmission.
Gapu iti daytoy, kidkiddawen manen ni Mayor Magalong ti kooperasyon ti publiko, nangruna iti panagtulnog iti minimum public health standards tapnu masalwadan ti bagi dagitoy manipud iti napegpeggad a variants ti COVID-19.
